16 May Ngā hua rau o te hiki maitai

Hei āpiti atu ki ngā kaupapa tini e amohia ake ana e te iwi i te nuku roa o te whenua, ko te Whitirau, Nakawhiti rānei ki ētahi, tētahi o ngā tāwara reka o te wā, ā, ko tētahi o ōna peka he arotahi ki ngā momo hiki e kīia nei ko ngā Olympic Lifts. Heoi anō, he nui atu ōna hua i te hiki kau noa i ngā taumaha e pā nei ki te oranga o te tangata, nā konā i mahara ake ai kia whakaritea tētahi wānanga hei ara whakawhanake i te oranga o te iwi, i tapaina ki te ingoa ‘Amohia te ora’.

I te 7 o Mei, ka tautokohia e Toi Tangata ngā mahi a tētahi tautōhito ki ngā mahi Olympic Lifting, arā ko Montel Tivoli tērā. Kua roa tēnei toa e whakatauira ana i te kounga i ēnei mahi me tana tautoko i te hunga pīkoko i roto i ngā tau, ka mutu, waimarie ana mātou i whakaae mai te whare whakangungu, a Te Yard Fitness, kia tū te kaupapa nei ki reira, he ōrite nō ngā whāinga me ngā tūmanako e whāia ana e tēnei kaupapa. Mārakerake ana te kitea o ngā mātāpono o te Māori i tēnei wānanga, pēnei i tā te tangata manaaki i tētahi atu, te kawe ngātahi i te mānuka kua whakatakotohia, te whakawhanaungatanga, arā ngā hua tini e pā nei ki te oranga o te tangata.

E mihi nei ki a Montel Tivoli i tuari nei i ōna tini kura hei painga mō te iwi, ki a Jarrod Tua mōna i whakatūwhera i ngā tatau o Te Yard Fitness hei whakaruruhautanga mō te motu, tae noa atu ki te hunga i tae ki te wānanga, nā koutou i tino eke ai tēnei kaupapa. E ngā toa e hāpai ake ana i ēnei mahi i ngā tōpito o te motu, kia kaha tonu rā!