Warning: count(): Parameter must be an array or an object that implements Countable in /srv/users/toitangata/toitangata.co.nz/wp-content/plugins/timetable/timetable.php on line 1361
He Pi Ka Rere, Ka Tau E! - Toi Tangata
 

He Pi Ka Rere, Ka Tau E!

I mua tonu o te raumati, i whakahaere ngā wānanga He Pī Ka Rere ki te rohe o te Waiāriki-Mātaatua. I tu tētahi ki Whakatāne, tētahi hoki ki Tauranga Moana. 

Tuatahi, me mihi ka tika ki ngā kaimahi o ngā Kōhanga Reo, nā rātou tēnei kaupapa i kawe, hei whakakī i te kete o te mātauranga, hei akiaki, hei poipoi i ngā tamariki mokopuna me ngā whānau hoki. 

I aro tōtika ngā rā e rua o te wānanga,  ki ngā atua Māori, he pou hei arataki i ngā mahi korikori tinana me te kai. Mā te ihi, te wehi, te wana, mā ngā mahi whakawhanaungatanga, e tūwhera ai ngā tatau ki ngā nekehanga rerekē, e tutuki hoki ngā whāinga o te kaupapa nei. 

Nō reira, nei rā te mihi ki ngā Kōhanga Reo o te Purapura o Te Mānuka Tūtahi, ki ngā Kōhanga Reo o Tauranga Moana anō hoki. Ko koutou ngā manu taikō, ngā ringa raupā o te kaupapa ia rā. Ko koutou ngā kai arataki i ngā tamariki mokopuna tae noa ki tā rātou pakaritanga. 

Ā te tau e heke mai ana, ka whakarite wānanga anō ki te taha o ngā purapura Kōhanga Reo o te Waiāriki-Mātaatua. Hei te mutunga mai o tēnei, ka whakakōtahi ngā Kōhanga Reo katoa o te rohe nei, e tū ai tētahi rā whakahirahira, he rā HE PĪ KA RERE MOTUHAKE!!

I tau hoki te kaupapa o He Pī Ka Rere ki te tonga, ki te takiwā o Ōtepoti, o Waihōpai. He mīharo katoa te rongo i te rerekētanga o ngā pūrākau, mātauranga hoki o tērā moka o te motu, o Waka-a-Maui, o Te Waipounamu. Ko te painga o tēnei kaupapa, he whakakōrero i ngā pūrākau huri noa i a Aotearoa. 

I waimarie hoki mātou, nā te Kura Auraki o Waverley Place mātou i whakatau ki Waihōpai. He rawe te kite i te hunga rangatahi e kawea ana tēnei kaupapa. Ko ēnei rangatira mō āpōpō, e whakapakari ana i ngā pūkenga o te rangatira, e whāngai i te mātauranga ki ngā teina, ki ngā kaiako hoki, e taki ana i te ihi, te wehi, te wana i roto i tēnei kura whānui, emana ai te kōrerō, “Ka pū te ruha, ka hao te rangatahi”. Ko He Pi Ka Rere he kaupapa e hāpai ana i ngā rangatira mō āpōpō, kia mau tonu ratou ki ngā mātauranga a ō tātou tūpuna, kia eke ki te toi o ngā rangi.